الحلقة الثانية
و يتذكرا اليوم الرياضي و ما حدث فيه :
يتحدث الأستاذ رياض يوم الأربعاء في الإذاعة المدرسية :
الأستاذ رياض : و بكرة يا ولاد إن شاء الله هيكون يوم رياضي ، هنحتفل بعيد الأم , و هيكون بردو في نشاط رياضي ، عايزين الطلاب يشاركوا علشان في لجنة بكرة جاية من الوزارة ، لازم تبيضوا وشي يا ولاد .
في الطابور :
رامز : هنخليه زي الفل .
نادر : و القطنة ما بتكدبش .
..............................................................................
و في أثناء الفسحة (يوم الأربعاء ) يتحدث عمرو ( أحد زملائهم ) :
عمرو : يعني يا جماعة ينفع اللي بيحصل في فلسطين ده ؟ كل يوم ناس بتموت ؛ و إسرائيل مزوداها علي الأخر ، و إحنا قاعدين نتفرج ! لازم نعمل حاجة مفيدة ، لازم نقول رأينا ، كل المدارس طلعت مظاهرات ، لازم نتحرك .
رامز ( بصوت خافت ) : لقيتها .
نادر : يا ابن اللعيبة .
..............................................................................
و في اليوم الرياضي قام رامز بتقديم الحفل :
رامز : أما الآن فمع أغنية ( ست الحبايب ) مع الطالب : حسام كامل .
نادر : فعلا ده شبة فايزة أحمد .
و يبدأ الطالب في الغناء .
رامز : و نلتقي الآن مع الأب الحنون ، قائد مدرستنا للتطور و الإزدهار مع الأستاذ رياض مدير المدرسة .
الأستاذ رياض : شكرا يا ابني .
و تستمر فقرات الحفل تباعا حتي موعد المباراة :
أما الآن فننتقل لنشاهد مباراة كرة القدم بين فريقي 1/3 و 2/3 ، و يقوم بالتعليق الطالب : نادر علاء .
نادر : طبعا أنتو عارفين النهاردة مباراة قوية بين فريقين كبار ، و أنتو أكيد عارفين الفريقين ، و إلا ما تبقوش من مدرستنا ، ساعتها مش مهم تعرفوا ، يلعبها هاني لأحمد القصير ، طبعا ده مش أسمه الحقيقي ، بس ده علشان هوه قصير ، و في واحد تاني اسمه أحمد الطويل طبعا علشان طويل شويه و بردو في 2/3 معانا في الفصل قاعد ورا خالص ، أكيد طبعا لأنه طويل ، إنما قصة الواد أحمد القصير بصراحه هوه أبوه كان قصير حبتين ......
الأستاذ رياض : الله يخرب بيتك ؛ أستاذ حسن شوف الواد الأهبل ده .
الأستاذ حسن : و بعدين يا نادر !
نادر : و بنحيي أستاذ حسن أجمد مدرس علوم ، يلعبها أحمد الطويل ، تتخطف من إبراهيم رونالدو ، طبعا ده مش اسمه ، ده علي اسم رونالدو بتاع البرازيل ، و كرة خطيرة ، و جووووووووووووون ، إبراهيم رونالدو و الهدف الأول ، طبعا زي ما أنتو شايفين في الإعادة الخطأمن حارس المرمي مش متمركز صح ، الواد طارق ده أنا عارفه ؛ كان سهران إمبارح و ما نامش كويس ؛ أصلا الواد ده بيشرب سجاير ؛ إمبارح شوفته بعد المدرسة .....
طارق ( بصوت خافت ) : يا ابن ال........(كلمة خارجة ) .
نادر : سامعك يا طارق ، بتشتم في سرك .
أحد الموجهين : إيه ده ؟
الأستاذ رياض : دمهم خفيف ، الولاد بيحبوا يهزرو .
..................................................................................
و بعد المباراة :
رامز : و في نهاية الحفل لازم نفتكر كلنا اللي بيحصل في فلسطين ...
الأستاذ رياض : ولد مجتهد .
رامز : لازم نشارك ، و دلوقتي إحنا هنعمل مظاهرة علشان نعبر عن اللي جوانا ....
الأستاذ رياض : يا نهار أسود !
رامز : خيبر خيبر يا يهود جيش محمد سوف يعود .
و يكرر الطلاب ما يقوله رافعين علم فلسطين .
رامز : يا شارون يا شارون روح ألبسلك بنطلون .
نادر : يعني هوه مصيف طول السنة ؟
و يكرر الطلاب ما يقوله ( رامز ) رافعين علم فلسطين .
عمرو : أيوة كدة ، ده كان لازم من زمان .
..................................................................................
و بعد الحفل :
الأستاذ رياض : إيه يا ابني اللي أنت عملته ده ؟ أنت ودتني في داهية أنت و زمايلك ، بس أنت السبب الرئيسي .
رامز : إحنا حبينا نشارك في القضية .
الأستاذ رياض : ده أنتو كنتو هتلبسوني قضية لولا ستر ربنا ، و بتقولي نعبر ، عايز تعبر ؟ طب أنت مفصول أسبوع علشان تعبر براحتك في البيت ، و لما ترجع هيبقي ليا تصرف تاني معاك .
.................................................................................
و في المساء يلتقي نادر و رامز في قسم الشرطة :
الضابط : يعني أنت عاملي فيها وطني أوي و بتعبر يا روح أمك ؟
رامز : وطني إيه ؟ لا أنا رامز يا باشا .
الضابط : أنت بتشرب ميه كتير ياض ؟
رامز : أحيانا لما بكون عطشان ، ليه ؟
الضابط : علشان دمك خفيف يا روح أمك ، و يصفعه علي قفاه .
الضابط : و أنت ياض كنت معاه بتعبر بردو ؟
نادر : لأ ده أنا كنا بعلق علي الماتش بتاع 1/3 و 2/3 .
رامز : و الله يا باشا عمرو هوة اللي سخنني ، و أنا عمري ما طلعت مظاهرة .
الضابط : مين عمرو ده ؟
رامز : ده واد في 2/3 .
نادر : هوه اللي قالنا نعمل مظاهرة يا باشا .
الضابط : أنت بتتكلم ليه يا ابن ال........(كلمة بذيئة )؟
نادر ( بصوت خافت ) : شكلك هتضيع نفسك .
الضابط : نعم ؟
نادر : بقول أنا آآآآسف .
الضابط : علي العموم أنا هروحكو ، أنا عارف أنكوا مالكوش في البطيخ ، بس لو شفتكو هنا تاني أنتو عارفين أيه اللي هيحصلكوا ؟
رامز : مش عايزين نعرف ، كده تمام أوي .
...................................................................
رامز و نادر عبر الأنترنت :
رامز : فاكر اللي حصل للواد عمرو ؟
نادر : ده غاب أسبوع ؛ و لما رجع كان متخرشم ، و لما سألته قاللي كان ماتش كورة رخم .
رامز : كويس إنه ما يعرفش إننا السبب .
نادر : كويس إنه فضل عايش أصلا هههههههههههههههه .
..........................................................................
و في أحد الأيام يجد رامز شيئا غريبا يشد إنتباهه بجوار العمارة اللي يقطن بها :
رامز : إيه ده ؟ كل الناس دي بتيجي الشقة دي ليه ؟ أكيد في سر ؛ بس إيه حكاية الشقة دي ؟ دي بقالها يجي شهرين ساكنة و عاملة كل اللمة دي ...! بس هيا بقالها شهرين بس و لا أكتر ؟ و اشمعنا الناس بتيجي الساعة 1 بعد نص الليل ؟!
........................................
وإلي اللقاء في الحلقة القادمة
ليست هناك تعليقات:
إرسال تعليق